Mharo Rajasthan Rangeelo Pyaro Rajasthan Lyrics
म्हारो राजस्थान रंगीलो, प्यारो राजस्थान
वीरां-धीरां री आ धरती, म्हांनै गरव-गुमान |
चंबळ-लूणी सा नड-नाला,सूरज-नगरी सूर उजाला
मिंदर-मसजिद घणा सिवाला,डगर-नगर भगवान |
म्हारो राजस्थान रंगीलो, प्यारो राजस्थान
वीरां-धीरां री आ धरती, म्हांनै गरव-गुमान |
ढोल-ढमंकै बाजै डैरूं ,धरण रुखालै बावन भैरूं
चौसठ जोगणियां अठ-फेरूँ ,करै रगत-असनान |
म्हारो राजस्थान रंगीलो, प्यारो राजस्थान
वीरां-धीरां री आ धरती, म्हांनै गरव-गुमान |
आडावळ है अडिग हिमालो, आबू-गढ़चित्तोड़ निरालो
हळदी-घाटी जबरो खालो, सूर -वीर री खान |
म्हारो राजस्थान रंगीलो, प्यारो राजस्थान
वीरां-धीरां री आ धरती, म्हांनै गरव-गुमान |
धूळ-धरा री सोनै वरणी, रंग बिरंगा वेस संवरणी
ठोड़-ठोड़ झीलां मनहरणी, लहर-लहर ले तान |
म्हारो राजस्थान रंगीलो, प्यारो राजस्थान
वीरां-धीरां री आ धरती, म्हांनै गरव-गुमान |
धर्म-ध्यान रा गीत उजागर, पुष्कर-तीरथराज लुहागर
मीरां मेड़तणी नटनागर, रा नित गूंजै गान |
म्हारो राजस्थान रंगीलो, प्यारो राजस्थान
वीरां-धीरां री आ धरती, म्हांनै गरव-गुमान |
पांख-पखेरू भांत भतीला, बागां नाचै मोर हठीला
मधरा चालै ऊँट रंगीला, रणबंका री शान |
म्हारो राजस्थान रंगीलो, प्यारो राजस्थान
वीरां-धीरां री आ धरती, म्हांनै गरव-गुमान |
कण-कण मैं कविता किलकारै, मरबण मूमल सी सीणगारै
पद्मणी दर्पण रूप निहारै, अग-जग सो हैरान |
म्हारो राजस्थान रंगीलो, प्यारो राजस्थान
वीरां-धीरां री आ धरती, म्हांनै गरव-गुमान|
